© GvdS - Oscar

Ek was nog nooit ‘n oggend mens nie. Nie eers op die beste van dae het ek genoeg motivering om my kop op te lig nie. Ek word selde voor die wekker wakker en dan is dit oor ek wakker gesmeek word vir kos.

Lately gaan dit makliker…ek reken dit is om rede ek my vitamiene drink voor ek gaan slaap want dit skop in wanneer ek wakker word…. Maar dit maak net dat ek nie vir ewig snooze nie want dit kan ek net so goed soos slaap doen. Na die snooze trek ek vir Oscar nader dan lê ons eers bietjie lepel… en chat… oe die kat kan regtig vreeslik lekker vry… Dan lees ek bietjie my eposse… en krap op facebook rond… En dan eers… mik ek om die een voet voor die ander uit die bed te swaai.

Ek het al op skool in restaurante begin werk en ek reken dis waar ek die laat aande aangeleer het… Teen 8 uur kry ek my tweede asem en dan ek doen wat ek wil… maar ek raak nie moeg nie. Menige aande gaan kruip ek in net oor ek weet nou moet ek plan maak en nie noodwendig oor ek moeg is nie. Ek kan vir ure deurdruk en selfs sonder slaap klaar kom… maar laat ek nou my kop neerlê… Not a tiekie kry jy my weer daar op in die vroeë oggend ure nie. Ek het nou al probeer om my alarm loop afstand van die bed te sit en ek hoor waaragtig nie die gelui nie.

Daar is nou ietwat van ‘n probleem met my fantastiese slaappatroon… Ek is so moeg deur die dag dat ek aan useless grens. Ek reken hierdie dame van die nag roetine kan nie vir ewig aanhou nie.