My Dad….

Liewe Jesus

 Daar is soveel dinge op my pa se lys wat hy graag vir sy verjaarsdag wil hê, en alles kan vir hom gekoop word. Daar is klein goedjies en groter goeters, elkeen ‘n wens so na aan sy hart. U weet van elke dingetjie wat sy hart begeer, maar wat ek vir hom wil gee kan geen geld in die wêreld koop nie. Wat ek as wens vir my dad wil gee kan net deur U genade gegee word, en daarom wil ek U graag vra om een of twee van die volgende te onthou wanneer U hom seën met die nuwe lewensjaar.

•  Ek wens vir herkenning. U weet my dad is my hero, en help my asseblief om dit aan hom te wys. Ek het as klein dogtertjie so baie by hom geleer, al moes ek nou pakslae kry voor ek luister….. Die lewenslesse het egter nooit opgehou nie en ek leer as jong vrou nog steeds so baie. Ek leer uit sy verhouding met U. Ek leer uit sy verhouding met ander….. Ek leer oor hy liefhet.
• Ek wens vir minder hartseer. U het dit goed gedink om ons jongste boetie, maar my pa se grootste vriend huis toe te neem. Ek wil vra dat U hom vrede in sy hart en innerlike krag sal gee om te verstaan, om te aanvaar en om aan te gaan. Al het drie jaar al uit die uurglas geloop, het nog niks makliker geraak nie, nog geen antwoorde is gekry nie, nog geen rowe is gesond nie…  Al is dit vir een dag, wil ek U vra om net daardie seer weg te vat. Ek sal settle vir ‘n split sekonde ook as ek moet.
• Ek wens vir gesondheid. Ons het drie maande terug gedink hy self gaan sy Leidsman en Meester ontmoet. Dankie dat die hartaanval geen blywende skade gelos het nie. Dankie dat dit net as wake-up call gebruik is om my te laat besef my pa is ook verganklik en my tyd saam hom is min en tog so kosbaar. Seën my pa asseblief met ‘n gesonde lewe tot U hom eendag kom haal.
• Ek wens vir voorspoed. My pa het nog altyd sy beste vir U Koninkryk gegee en ek wil U vra om hom te seën op die plekke in sy lewe waar dit swaar gaan. U weet waar die nood is.
• Ek wens vir gemoedsrus. Soos ‘n Pa maar is liewe Heer, bekommer my pa hom te veel. Maak sy hart rustig met die wete dat sy kinders wel lewensmaats sal kry, wanneer die tyd reg is want elke pa wil tog eendag ‘n oupa word.   

Jesus, ek vra nie alles uit verdienste nie, maar alleenlik uit U groot genade.

 Dankie vir so ‘n stunning pa!

 Amen

 PS. Happy Birthday Dad!